عمرو أديب: لم 'أطفش' نيرفانا؟!

نقلا عن جريده الاخبار - ملحق الاذاعه والتليفزيون
54 السنة - 16681ه - العدد1426رمضان من 6- م 2005أكتوبر من 9 الأحد

http://www.elakhbar.org.eg/issues/16681/1005.html

عمرو أديب علي طريقة 'بيبو' فرقع 'جي جي'، قالوا ان 'عمرو' طفش 'نيرفانا' ودأب علي 'التحرش' بها 'إعلاميا'، فما كان منها إلا ان لملمت 'عزالها' من 'القاهرة اليوم' في 'أوربت'، لتضعه في 'البيت بيتك' بالقناة الثانية، وهو الأمر الذي دعانا إلي مواجهة 'عمرو أديب'..

انت ليه 'طفشت' نيرفانا من 'القاهرة اليوم'؟

أنا لم 'اطفش' نيرفانا، الناس هي اللي 'طفشتها'، لأن دي محطة بفلوس 'أوربت' ولازم الناس تبقي سعيدة وهي بتتفرج، لكن الطريقة اللي كانت 'نيرفانا' بتتعامل بيها مع الناس ماكنتش بتسعدهم وهو ده السبب الوحيد اللي أدي إلي انها 'طفشت' أو مشيت، انما أنا ماليش دعوة بالموضوع ده.
يا 'عمرو' قول كلام غير ده؟

هو ده الكلام اللي عندي، وبعدين أنا لا أملك 'أوربت'، دي محطة ليها إدارة هي اللي بتاخد القرارات وهي اللي مشت 'نيرفانا'.
هل تفتقد 'نيرفانا' وانت قاعد لوحدك بتقدم البرنامج؟وجودي لوحدي مختلف، كل اللي في دماغي أن الشغل يتعمل كويس، والناس تشوف حاجة مهمة، وده اللي نجحت في ان أعمله، سواء في حلقة 'عمرو خالد' أو حلقة الراجل القطري اللي موت الشاب المصري في سباق العربيات، الناس تاني يوم قالت شوفنا كذا وكذا في 'القاهرة اليوم'، شوفنا حاجة ليها معني، ماحدش قال فين نيرفانا.

يعني هي لم تخطر علي بالك ولو للحظة واحدة؟

حجم المسئولية لايدع لي أي فرصة للتفكير في أي شيء سوي ما أقدمه علي الهواء،

مفيش حاجة اسمها ذكريات، انا مهتم بالضيف والتليفونات وال 'SMS' والتعليمات التي تأتي من 'الكونترول روم'، كل ده 'يفرم' أي حد، يعني لو كانت معايا 'مارلين مونرو' لازم أنساها.

هل انت مع من يقول ان 'البيت بيتك' مسروق من 'القاهرة اليوم'؟

طبعا 'البيت بيتك' مسروق مننا، والنهاردة بقي رسمي، الديكور والفكرة والمذيعين، وكانت هناك أكثر من محاولة معي لأقدم 'البيت بيتك' لكني رفضت، واتعرض عليٌ أبقي ضيف فيه هذا الاسبوع لكني رفضت أيضا لأني مشغول.
هل هذا هو العرض الوحيد الذي تلقيته للعمل في التليفزيون؟تلقيت عرضا آخر من 'طارق نور' لتقديم برنامج عقب الإفطار وعندي العقد في البيت، لكني أحب 'أوربت' واحترمها ولولاها كان زماني ولاحاجة، وسأظل معهم لحد مايمشوني، وهابقي ماشي وأنا وهما بنحب بعض.

رأيك في برنامج 'البيت بيتك'؟

رأيي ان هذا هو الافتتاح الثالث للبيت بيتك، وأرجو ان يكون ناجحا.

يعني ايه الافتتاح الثالث؟

يعني أول مرة قدموه مجموعة من المذيعين والمذيعات، ثم تم تصفيتهم واقتصر علي مجموعة بعينها وهذه هي ثاني مرة، وحاليا هو في الافتتاح الثالث وأرجو ان يكون ناجحا لأن التالتة تابتة.

من أين لك كل هذه الثقة البرامجية، مع انك مذيع 'أصلع' لم أقل أقرع ولست وسيما؟

المذيع المسمسم اللطيف أبوصوت عميق، أصبح موضة قديمة، الناس دلوقتي عايزة حد منهم، حاسس بمشاكلهم، وأنا باقول اللي في دماغ الناس ودي أهم ميزة لأني باعرف الناس بتفكر في ايه وأشعر تماما بالنبض العام لأني أتابع كل شيء، كنت قلقا زمان لاني مش وسيم، ولأني باتكلم بطريقة تبدو غريبة، لكن دلوقتي خلاص، وعادي جدا وباتكلم مع الناس في عيوبي وأقولهم اني 'أصلع' وتقريبا احنا البرنامج الوحيد اللي سمح للمشاهد يتدخل في شكل المذيع وينتقده ويقول انت لابس كده ليه وبتتكلم كده ليه وبالتالي كسرنا كل الحواجز وقفزنا فوق كل العيوب.